Tá Gramadach gan Stró! dírithe ar dhaoine a bhfuil caighdeán réasúnta maith bainte amach acu sa Ghaeilge labhartha cheana féin ach ar mian leo feabhas a chur ar a gcuid gramadaí agus cur lena saibhreas sa teanga. Tá an cúrsa seo oiriúnach dóibh siúd nach dtuigeann cúrsaí gramadaí de ghnáth agus a gcuireann rialacha casta mearbhall orthu. Tá béim láidir ar úsáid laethúil na Gaeilge agus eolas tugtha mar gheall ar na difríochtaí idir an rud a scríobhtar agus na leaganacha a bhíonn le cloisteáil sa chaint.

Ní fhéachtar sa chúrsa le cur síos cuimsitheach a thabhairt ar ghramadach na Gaeilge; dírítear ar na gnéithe is lárnaí den ghramadach sin agus mínítear iad ar bhealach soiléir, gonta. Ní bhaintear úsáid as téarmaíocht chasta ach tugtar neart samplaí chun patrúin éagsúla a léiriú.

Údar

Is é Éamonn Ó Dónaill, duine de bhunaitheoirí an chomhlachta Gaelchultúr (www.gaelchultur.com), a scríobh ábhar an chúrsa seo. Rinne Helen Hegarty eagarthóireacht ar Gramadach gan Stró! agus scríobh sí cuid de chleachtaí an chúrsa fosta.

Tá ceithre aonad is fiche ar fad sa chúrsa Gramadach gan Stró! agus tá míniúcháin ghramadaí, ceachtanna idirghníomhacha, alt tráthúil agus dea-scríofa, agus cora cainte úsáideacha i ngach ceann acu. Nuair a bheidh staidéar déanta agat ar an ábhar ar fad sa chúrsa agus nuair a bheidh na cleachtaí go léir déanta agat, is féidir leat triail a bhaint as an Scrúdú Ceannchúrsa, atá le fáil tar éis Aonad 24, chun an dul chun cinn atá déanta agat a mheas.

Aonaid an chúrsa

• Aonad 1: Téarmaíocht na Gramadaí
• Aonad 2: An tAinmfhocal 1
• Aonad 3: Réamhfhocail Shimplí
• Aonad 4: Réamhfhocail Shimplí agus an tAlt
• Aonad 5: An tAinmfhocal 2 (An Tuiseal Gairmeach)
• Aonad 6: An tAinmfhocal 3 (An Tuiseal Ginideach)
• Aonad 7: An Aidiacht 1
• Aonad 8: An Aidiacht 2
• Aonad 9: An Briathar 1 (An Modh Ordaitheach)
• Aonad 10: An Briathar 2 (An Aimsir Chaite)
• Aonad 11: Maoluimhreacha agus Bunuimhreacha Neamhphearsanta
• Aonad 12: An Briathar 3 (An Aimsir Láithreach)
• Aonad 13: Dátaí / Na hOrduimhreacha
• Aonad 14: Suíomh, Gluaiseacht agus Am
• Aonad 15: Coibhneasta Díreach agus Coibhneasta Indíreach
• Aonad 16: Na hUimhreacha Pearsanta
• Aonad 17: An Briathar 4 (An Aimsir Fháistineach)
• Aonad 18: An Aidiacht Shealbhach
• Aonad 19: Na Forainmneacha Réamhfhoclacha
• Aonad 20: An Chopail Is
• Aonad 21: An Briathar 5 (An Modh Coinníollach/Má & Dá)
• Aonad 22: An Briathar 6 (An Briathar Saor)
• Aonad 23: An tAinm Briathartha agus an Aidiacht Bhriathartha
• Aonad 24: An Briathar 6 (An Aimsir Ghnáthchaite)

• Tá ceithre aonad is fiche ar fad sa chúrsa Gramadach gan Stró! agus tá meascán de mhíniúchán agus de cheachtanna i gceist i ngach ceann acu.
• Tar éis duit roinnt rialacha gramadaí a léamh, bíonn deis agat ansin ceachtanna a dhéanamh bunaithe ar na rialacha sin.
• Tá na ceachtanna ar fad idirghníomhach. Nuair a bhíonn ceacht déanta agat is féidir leat an cnaipe Seol a bhrú agus aiseolas a fháil láithreach. Cuirtear in iúl duit cad iad na freagraí a bhí ceart agat agus cad iad na freagraí a bhí mícheart agat, cuirtear na freagraí cearta ar fáil duit agus tugtar scór duit.
• Ag tús gach aonaid, cuirtear in iúl duit cad iad na rudaí a bhfuiltear ag díriú orthu san aonad sin.
• Chun bogadh ó scáileán go scáileán níl le déanamh agat ach cliceáil ar na saigheada ar thaobh na láimhe clé (le dul siar) nó ar thaobh na láimhe deise (le dul chun tosaigh). Is féidir leat cliceáil ar líne ar bith faoi na focail PLEAN AN AONAID ar an taobh clé den scáileán chun dul go dtí áit éigin eile san aonad.
• Tá alt le fáil i ngach aonad agus bíonn ort bearnaí a líonadh ann. Tá sé mar sprioc ag an ngníomhaíocht seo aird a tharraingt ar ghnéithe éagsúla de ghramadach na Gaeilge, cinn atá i gceist san aonad féin agus cinn atá le fáil in aonaid eile chomh maith. Tugann na sleachta seo deis duit an ghramadach a fheiceáil i gcomhthéacs, seachas as comhthéacs mar a tharlaíonn go minic i múineadh na gramadaí.
• Nuair a bhíonn na bearnaí go léir in alt líonta agat, níl le déanamh agat ach Seol a bhrú agus cuirtear in iúl duit cad iad na freagraí a bhí ceart agus mícheart agat. Má chliceálann tú ar an íocón mínítear an freagra duit.
• Ag deireadh gach aonaid, tá deich gcor cainte le fáil sa rannóg Saibhreas na Gaeilge. Tar éis dó na habairtí úsáideacha seo a fhoghlaim, beidh deis ag an bhfoghlaimeoir tabhairt faoi chleachtaí atá bunaithe orthu.
• Nuair a bheidh staidéar déanta agat ar an ábhar ar fad sa chúrsa agus na cleachtaí go léir déanta agat, bain triail ansin as an Scrúdú Ceannchúrsa, atá le fáil tar éis Aonad 24.
• Ar an leathanach scoir, tugtar léargas duit ar an obair a bhíonn déanta agat san aonad agus tugtar scór iomlán duit. Tugtar cúpla rogha duit chomh maith: dul ar aghaidh go dtí an chéad aonad eile, an t-aonad a dhéanamh arís, nó dul go tús an chúrsa ar fad.

Ag úsáid an chúrsa

• Tá ceithre aonad is fiche ar fad in Gramadach gan Stró! agus molaimid d’fhoghlaimeoirí staidéar a dhéanamh ar aonad amháin sa tseachtain. Ná téigh ar aghaidh go dtí aonad nua go dtí go mbeidh na cleachtaí ar fad in aonad déanta agat agus iad go léir ceart.
• Ní leor triail a bhaint as na ceachtanna uair amháin – moltar duit iad a dhéanamh cúpla uair.
• Nuair a bheidh staidéar déanta agat ar an ábhar ar fad sa chúrsa agus na cleachtaí go léir déanta agat, bain triail ansin as an Scrúdú Ceannchúrsa, atá le fáil tar éis Aonad 24.

Fóram

Tá fóram curtha ar fáil don chúrsa Gramadach gan Stró! (agus déanfar amhlaidh i gcás na gcúrsaí eile a bheidh ar an suíomh seo) agus tá deis acu siúd atá cláraithe don chúrsa teachtaireachtaí a sheoladh chuig an bhfóram agus plé a dhéanamh ar cheisteanna ag baint leis an ngramadach, aistriúchán, stór focal, etc.

Cathain is féidir liom tús a chur leis an gcúrsa?

Anois díreach! Staidéar neamhspleách, gan aon mhúinteoir, atá i gceist. Mar sin is féidir leat feabhas a chur ar do chuid Gaeilge ar do shócúlacht, san oifig nó sa bhaile, ag do luas féin, agus ag am ar bith is mian leat.

Cad a dhéanfaidh mé má tá ceist agam?

Scríobh ar an bhfóram í! Beidh tú in ann dul i dteagmháil leis na foghlaimeoirí eile ar an bhfóram seo. Is féidir leat teachtaireachtaí a scríobh, ceisteanna a chur agus a fhreagairt, agus smaointe a nochtadh ann. Bíonn baill d’fhoireann Ghaelchultúir ar an bhfóram freisin, agus beidh siadsan in ann aon cheisteanna casta a fhreagairt.